ნინო კაჟაშვილმა დაამთავრა ივანე ჯავახიშვილის სახ. თბილისის სახელმწიფო უნივერსიტეტის მექანიკა-მათემატიკის ფაკულტეტი. ასევე, სწავლობდა საქართველოს ტექნიკურ უნივერსიტეტში ინფორმატიკისა და მართვის სისტემების ფაკულტეტზე. ნინო, 2006 წლიდან დღემდე, სხვადასხვა პროგრამის ფარგლებში თანამშრომლობს განათლებისა და მეცნიერების სამინისტროსთან. არის მასწავლებელთა პროფესიული განვითარების ეროვნული ცენტრის ინფორმაციულ-საკომუნიკაციო ტექნოლოგიების ტრენერ-კონსულტანტი და იმავდროულად, რამდენიმე ტრენინგ-მოდულის ავტორი/თანაავტორი; თანამშრომლობდა ინოვაციების და ტექნოლოგიების სააგენტოსთან (Gita), იყო Front-End Development ტრენერი. ასევე, თანამშრომლობდა საერთაშორისო კვლევისა და გაცვლების საბჭოს (IREX) თბილისის ფილიალთან პროექტის „ისწავლე, რათა ამოიცნო“ ფარგლებში; იყო მედიაწიგნიერების მასტერ ტრენერი და მოდულის შინაარსის მოდიფიცირების სამუშაო ჯგუფის წევრი. თანამშრომლობს კომუნიკაციების ეროვნულ კომისიასთან, ატარებს ტრენინგებს „დეზინფორმაცია, როგორც გამოწვევა - კრიტიკული აზროვნების განვითარება სკოლებში“. 

გიორგი ლომსაძემ დაამთავრა თბილისის სახელმწიფო უნივერსიტეტის ქართული ფილოლოგიის საბაკალავრო პროგრამა და ასევე, ილიას სახელმწიფო უნივერსიტეტის შუა საუკუნეების კვლევების სამაგისტრო პროგრამა. სწავლობდა ილიას სახელმწიფო უნივერსიტეტის სადოქტორო პროგრამაზე დიგიტალური ჰუმანიტარიის მიმართულებით. ამჟამად, სწავლობს წმინდა ვლადიმირის სახელობის მართლმადიდებლურ სემინარიაში (აშშ, ნიუ იორკი).

გიორგი მუშაობდა მე-6 საავტორო სკოლაში ქართული ენისა და ლიტერატურის მასწავლებლად. გოეთეს ფრანკფურტის უნივერსიტეტის პროექტის ფარგლებში იმუშავა ათონის მთის ივერთა მონასტერში დაცული ხელნაწერების დიგიტალიზებასა და კატალოგის მომზადებაზე. იყო ევროკომისიის პროექტ SELFIE-ის რეგიონული კოორდინატორი. PH International-ის პროექტის ფარგლებში, მონაწილეობას იღებდა სამართლებრივი კულტურის ელექტრონული რესურსის შექმნაში.

გიორგი არის პროექტის მენეჯერი და რედაქტორი განათლებისა და მეცნიერების სამინისტროს ტექნოლოგიებისა და ინოვაციების სამსახურში, რომლის ფარგლებშიც შექმნილია არაერთი საგანმანათლებლო ელექტრონული რესურსი.